ٱلْمُتَكَبِّرُ

Allahu është el-Mutekebbir – jo thjesht më i madhi, por më i larti në qenësi, në cilësi dhe në të qenët mbi çdo gjë që i atribuohet padrejtësisht.

Emri el-Mutekebbir e bën të qartë se Allahu as krahasohet, as kufizohet, as barazohet me asgjë.

Çdo gjë që ndodh për ta turpëruar mendjemadhin, për ta zbuluar të pavërtetën, për të shkatërruar lavdinë e rreme, vjen nga el-Mutekebbir.

El-Mutekebbir është tejet i lartë që të bëjë padrejtësi. Atij nuk i takon të harrojë. Koprracia është shpifje ndaj Tij.

El-Mutekebbir ua thyen krenarinë atyre që e ngrijnë mendjen mbi shpalljen hyjnore. Me kalimin e kohës, Ai shpërfaq kalbësinë e bindjeve të gabuara.

Mendjemadhësia nuk bashkëjeton assesi me përulësinë e vërtetë, sepse edhe një thërrmijë mendjemadhësie e mban zemrën larg el-Mutekebbir.

Pasi të kuptosh urdhrin e Allahut, shenja më domethënëse e përulësisë ndaj Tij është fjala “Dëgjuam dhe u bindëm”. Kjo është përgjigjja që i ka hije madhështisë së el-Mutekebbir.