ٱلْوَدُودُ

El-Veduud është i Dashuri që i do robërit besimtarë me një dashuri të posaçme. Ai ua ndryshon zemrat që ta duan Atë dhe t’i binden, i nderon duke i bërë të dashur në qiell e në Tokë, dhe i do vetëm për të mirën e tyre, jo pse ka ndonjë nevojë për ta.

Dashuria e Allahut është e veçantë dhe nuk ngjan me dashurinë njerëzore. Kur Allahu e do dikë, e do me një dashuri që i ka hije madhështisë së Tij. Kjo dashuri është dhunti e posaçme nga Allahu për robërit që Ai përzgjedh.

Kur Allahu e do një rob, e përmend para Xhibrilit dhe engjëjve të tjerë, të cilët e duan po ashtu dhe përhapin dashurinë për të edhe në Tokë. Të të përmendet emri yt nga Allahu dhe të bëhesh i dashur për banorët e qiellit është nderi më i madh për ty.

Fitimi i dashurisë së Allahut fillon me kryerjen e obligimeve dhe me pastrimin e zemrës duke larguar haramin nga ajo. Pendimi dhe kërkimi i faljes është porta e parë drejt kësaj dashurie. Vetëm atëherë kur thua me zemër “O Zot, më fal!” të hapet shtegu për të fituar dashurinë e Tij.

Dashuria e Allahut është një mejdan për garuesit shpirtërorë. Allahu i do ata që besojnë dhe bëjnë vepra të mira, u dhuron kënaqësi dhe u mbjell dashuri në zemra, në mënyrë që ta duan Atë më shumë se çdo gjë tjetër.

Dashuria e vërtetë për Allahun largon ngurrimin në bindje, ëmbëlson adhurimin dhe e bën të lehtë çdo sprovë. Kjo sepse mbrapa çdo urdhri dhe çdo caktimi të Allahut zemra sheh vetëm dashurinë e Tij për të. Kësisoj zemra gjen forcë për të flakur çdo joshje të kësaj bote.

Dashuria ndaj Allahut nuk është e plotë pa ndjekjen e të Dërguarit ﷺ. Kush e do Allahun, e ndjek të Dërguarin ﷺ në çdo aspekt. Atëherë Allahu e do robin, e mbush jetën e tij me të mira, dhe matës i vërtetë i dashurisë bëhet kënaqësia e ndërsjellë: Ai të do aq sa ti e do Atë dhe ti je i kënaqur me Të aq sa Ai është i kënaqur me ty.