ٱلْحَقُّ

El-Hak është i Vërteti i pandryshueshëm. Para Tij shuhet çdo e kotë dhe me Të qëndron çdo e drejtë. Kushdo që i kthehet Atij me bindje, gjen Zotin e mëshirës dhe të drejtësisë; kushdo që e kundërshton me kokëfortësi, gjen Gjykatësin që s’mund t’i ikë.

El-Hakk është e vërteta e pashoqe. Ai është mundësuesi i çdo qëndrueshmërie dhe udhëzimi të drejtë. Ai është e vërteta përfundimtare, nëpërmjet të Cilit çdo gjë tjetër merr kuptim dhe vlerë.

El-Hakk është i Vërteti në qenien, në fjalën dhe në gjykimin e Tij. Çdo fjalë, vendim e premtim i Tij është i drejtë dhe i saktë në mënyrë të përkryer. Kushdo që e beson këtë, gjen prehje në drejtësinë e Tij.

El-Hakk është Ai, që e bën besimin të gjallë dhe zemrën të qëndrueshme në të. Sa më thellë të përjetosh të vërtetën e ekzistencës së Tij, aq më të qartë do ta kesh të vërtetën e Xhenetit, të Ditës së takimit me Të dhe të çdo premtimi tjetër hyjnor.

Kur të njohësh Allahun si el-Hakk, fillon t’i shohësh gjërat me vlerën që kanë në të vërtetë. Atëherë ti kupton se shumë prej gjërave që njerëzit i madhërojnë, janë të pavlera realisht, dhe shumë prej atyre që i harrojnë, janë të çmuara tek Allahu.

Kur ta njohësh Allahun si el-Hakk, zemra pushon së dyshuari në të Vërtetën dhe mbushet me siguri. Atëherë, çdo fjalë e Kuranit bëhet më e dëshiruar për ty sesa çdo fjalë njeriu, dhe çdo vepër për Allahun të mbushë me një krenari të pashtershme.

El-Hakk është garanci për drejtësinë. Çdo padrejtësi do të marrë fund një ditë dhe çdo hak do të kthehet. Kushdo që vërtet njeh el-Hakk, nuk druan se nuk do ta marrë hakun, por druan se mos po e vonon kthimin në të vërtetën.